Heddiw (Dydd Mawrth, 1 Mehefin), mewn seremoni arbennig oedd yn cael ei darlledu’n fyw o Wersyll yr Urdd Llangrannog yng nghwmni’r beirniad a’r delynores o fri Catrin Finch, datgelwyd mai Alaw Grug Evans o Bontyberem sy’n ennill gwobr Prif Gyfansoddwr Eisteddfod T.

Mae Eisteddfod T ar ei hail ddiwrnod o ddarlledu ar ôl diwrnod gorlawn a llwyddiannus ddoe.

Mae Alaw yn ennill teitl y Prif Gyfansoddwr am gyfansoddi darn o gerddoriaeth dim mwy na 3 munud o hyd ar unrhyw thema. Yn ôl y beirniad Catrin Finch, roedd cyfansoddiad y tri a ddaeth i’r brig wedi creu argraff arni, gyda’r ensemble a gyflwynodd Alaw o dan y ffugenw ‘Siarad Mân’ yn “ysbrydoledig”, “gwybodus” a “phrydferth”.

Yn gyn-ddisgybl o Ysgol Gyfun Gymraeg Bro Myrddin mae Alaw yn 19 oed, ac yn ei blwyddyn gyntaf yn astudio Cerddoriaeth yn The Queen’s College ym Mhrifysgol Rhydychen. Er i Alaw gystadlu’n llwyddiannus mewn nifer o gystadlaethau llwyfan yn Eisteddfod yr Urdd, dyma’r tro cyntaf iddi gystadlu yn y cyfansoddi. Cyfansoddodd ‘Pwyll a Rhiannon’ fel rhan o gyfres o bedwar darn sy’n seiliedig ar geinciau’r Mabinogi, a gobaith Alaw yw cyfansoddi’r drydedd gainc yn y flwyddyn nesaf.

Yn ei beirniadaeth, meddai Catrin Finch: “Ges i bleser mawr yn beirniadu cystadleuaeth y Prif Gyfansoddwr eleni, ac i sylweddoli faint o gyfansoddwyr talentog ifanc sydd yma yng Nghymru. Mi roedd o mor galonogol i dystio i safon y cyfansoddi ac i sylweddoli pa mor ‘fyw ac iach’ mae cerddoriaeth ysbrydoledig pobol ifanc o’n cwmpas ni.

“Mi wnaeth ‘Siarad Mân’ ddewis ensemble ychydig yn wahanol - violin, viola, soddgrwth, trwmped a thelyn... Wnaeth lwyddo i greu darlun hefo defnydd o harmonies ac alawon hyfryd a diddorol. Patrymau yn gwehyddu a nodau yn  gweu at ei gilydd. Mi oeddwn i eisiau gwrando ar fwy!”

Bydd Alaw yn derbyn tlws arbennig wedi ei greu gan y cerflunydd Ann Catrin Evans. Noddwyd y gystadleuaeth hon gan Ymddiriedolaeth James Pantyfedwen. Yn ail yn y gystadleuaeth oedd Ioan Rees o Gyffylliog ger Rhuthun a Celt John o Ddolgellau oedd yn drydydd.

Gellir dod o hyd i holl ganlyniadau’r ŵyl hyd yma drwy ymweld â’r wefan s4c.cymru/urdd

Bydd Eisteddfod T yn cael ei chynnal gydol yr wythnos hon, 31 Mai - 4 Mehefin. Mae modd ymuno yn yr hwyl, ar deledu, radio ac ar-lein a bydd canlyniadau a gwybodaeth ar wefan s4c.cymru/urdd ac ar gyfryngau cymdeithasol yr Urdd gyda’r hashnod #EisteddfodT.