Trwy gydol yr wythnos hon mae Eisteddfod yr Urdd yn gwobrwyo’r holl waith Cyfansoddi a Chreu buddugol ddaeth i law yn 2020, cyn gorfod gohirio'r Eisteddfod yn Ninbych oherwydd Covid-19.
Yn gyn-ddisgybl Ysgol Botwnnog a Choleg Meinion Dwyfor Pwllheli, cwblhaodd Miriam radd mewn Ffrangeg a Sbaeneg ym Mhrifysgol Durham, cyn treulio dwy flynedd yn dysgu Saesneg Iaith a Llenyddiaeth ym Mhrifysgolion Limoges a Lyon yn Ffrainc, lle roedd hi hefyd yn cynnig gwersi ysgrifennu creadigol. Mae hi bellach yn byw yng Nghaerdydd ac yn gweithio i Lenyddiaeth Cymru.
Mae Miriam yn derbyn medal arbennig wedi ei chreu gan gwmni gemwaith Rhiannon o Dregaron. Bydd yn cael y cyfle i dreulio amser yng nghwmni Theatr Genedlaethol Cymru yn datblygu ei gwaith buddugol, derbyn hyfforddiant pellach gyda’r BBC, datblygu syniadau gyda Choleg Prifysgol y Drindod Dewi Sant, yn ogystal â threulio amser gydag S4C a chael cyflwyniad i ysgrifennu ar gyfer y teledu.
Carys Mair Bradley-Roberts o Gaerdydd oedd yn ail yn y gystadleuaeth, ac Elis Siôn Pari o Aberdaron ddaeth yn drydydd. Mewn partneriaeth â Llenyddiaeth Cymru, bydd y tri a ddaeth i’r brig yn cael gwahoddiad i gymryd rhan yng Nghwrs Olwen yng Nghanolfan Ysgrifennu Tŷ Newydd. Bydd Cwrs Olwen yn cynnig penwythnos cyfan o weithdai ysgrifennu creadigol, cymdeithasu ag awduron ifanc eraill, a dysgu am y byd llenyddiaeth a chyhoeddi.
Roedd gofyn i gystadleuwyr gyfansoddi drama a gymer rhwng 40-60 munud i’w pherfformio, ac yn ôl y beirniaid Llinos Gerallt a Sian Naiomi, daeth chwech drama i law gyda’r dramodwyr yn ysgrifennu’n “gyfoes a pherthnasol”:
“Hoffem ddiolch i bob cystadleuydd am eu hymdrechion a’u hymroddiad,” meddai’r beirniaid. “Roedd yr ysgrifennu yn sensitif, tyner a theimladwy. Calonogol iawn oedd darllen ambell berl o linell a wnaeth wir argraff arnom. Roedd cyfeillgarwch yn elfen amlwg iawn drwy’r gystadleuaeth a’r berthynas fregus a chymhleth rhwng ffrindiau yn mynd â bryd nifer o’r dramodwyr.”
Gosododd y beirniaid y gwaith i ddau ddosbarth, gyda phedwar darn yn y dosbarth cyntaf. Daeth Miriam i’r brig gyda “drama afaelgar a safonol”:
Meddai’r beirniad Llinos Gerallt: “Fe hawliodd y ddrama hon ein sylw o’r dudalen gyntaf. Mae’r berthynas rhwng dwy ffrind yn gymhleth a chyfoethog, gyda’r plot yn datblygu’n gelfydd wrth inni dyrchu i’w gorffennol. Drama sy’n llawn dirgelwch ac amwynder gyda diweddglo cryf. Mae cymhlethdod a blerwch bywyd i gyd yma. Mae’r dramodydd hefyd yn fardd, ond yn gofalu nad yw’r barddoniaeth yn tarfu ar lif a thempo’r ddrama.”
Fel rhan o wythnos arbennig ar blatfformau digidol yr Urdd, yn ogystal ag ar raglen Heno, S4C ac ar BBC Radio Cymru, cynhelir dathliad o weithiau buddugol a chyhoeddir enillwyr cystadleuaeth y Gadair, y Goron, y Fedal Ddrama a’r Fedal Gyfansoddi.