Cefndir Bwrdd y Celfyddydau
Mae’r Bwrdd hwn yn darparu arbenigedd a chyngor er mwyn llywio cyfeiriad strategol yr adran Celfyddydau ar gyfer y dyfodol. Bydd yn cynorthwyo’r adran yn ei gweledigaeth i ehangu cynnig celfyddydol gydol flwyddyn yr Urdd ynghyd â bod yn gyswllt i ddatblygu partneriaethau newydd i gyrraedd y nod. Mae Eisteddfod yr Urdd yn ddigwyddiad o bwys yng nghalendr Celfyddydol Cymru, yn denu 76,000 o gystadleuwyr ac yn cyfrannu £11M i economi Cymru. Rydym yn angerddol dros sicrhau fod cynnig celfyddydol cenedlaethol a chymunedol yr Urdd yn parhau i esblygu a thyfu yn gynhwysol a bod pob plentyn a pherson ifanc yng Nghymru yn cael y cyfle i gymryd rhan.
Arwel Gruffydd
Cadeirydd Bwrdd y Celfyddydau
Ar ôl graddio gyda BA Anrhydedd yn y Gymraeg o Brifysgol Bangor, derbyniais radd diploma mewn perfformio o academi ddrama Webber Douglas, Llundain. Wedi bron i ddau ddegawd o actio’n broffesiynol yn y theatr, ac ar radio, ffilm a theledu, bûm yn Rheolwr Llenyddol Sgript Cymru ac yna’n Gyfarwyddwr Cyswllt Theatr y Sherman yng Nghaerdydd. Bûm yn Gyfarwyddwr Artistig a Phrif-weithredwr Theatr Genedlaethol Cymru rhwng Ebrill 2011 a Mai 2022. Erbyn hyn rwyf unwaith eto’n artist llawrydd; yn actor, cyfarwyddwr, awdur a dramodydd, yn ogystal ag ymgynghorydd a hwylusydd yn y maes.
Mae aelodau y Bwrdd arbennig hwn, ar y cyd gyda’r cyfarwyddwr, yn gosod cyfeiriad strategol celfyddydol i’r Urdd, i sicrhau profiadau a chyfleoedd bythgofiadwy ym maes y Celfyddydau i blant a phobl ifanc yng Nghymru a thu hwnt.
Rôl Bwrdd y Celfyddydau
- Cefnogi'r cyfarwyddwr a staff yr adran i ddatblygu cynllun strategol yr adran gan gymeradwyo’r fersiwn terfynol.
- Adolygu (ar y cyd gyda staff yr Adran) nod strategol Adran yr Eisteddfod a’r Celfyddydau.
- Sicrhau atebolrwydd trwy graffu a monitro allbynnau a pherfformiad ariannol yr adran.
- Rhannu arweiniad a chefnogaeth mewn meysydd penodol ym maes y Celfyddydau.
- Cyflwyno argymhellion i Fwrdd Ymddiriedolwyr yr Urdd.
Rydym am apwyntio aelodau ychwanegol i Fwrdd y Celfyddydau
Mae hyd at 2 sedd wag ac rydym yn chwilio am brofiad yn y Celfyddydau.
Manylion y Rôl
- Mae tymor pob aelod o’r bwrdd yn para tair blynedd.
- Cynhelir 2 cyfarfod y flwyddyn sydd yn cynnwys cyfarfodydd ac ar-lein ac un cyfarfod mewn person y flwyddyn.
Beth rydym yn ei ddisgwyl:
- Ymroddiad i weledigaeth a gwerthoedd strategaeth gorfforaethol yr Urdd.
- Cydymffurfiaeth â egwyddorion llywodraethu da, gan gynnwys uniondeb, tryloywder a chyfrifoldeb.
- Parodrwydd i fynegi barn, cefnogi ac herio’n adeiladol, a chyfrannu at wneud penderfyniadau strategol.
Amrywiaeth a Chynhwysiant
Rydym yn ymrwymedig i greu byrddau sy’n adlewyrchu amrywiaeth Cymru. Rydym yn croesawu’n arbennig geisiadau gan unigolion o grwpiau sydd wedi’u tangynrychioli yng Nghymru.
Sut i wneud cais
Cwblhewch y ffurflen gais ar lein gan nodi:
- Eich profiad neu ddiddordeb perthnasol
- Pam rydych chi eisiau ymuno â Bwrdd Strategol
- Sut rydych chi’n uniaethu â gweledigaeth a gwerthoedd yr Urdd