Ymunwch â ni am brofiad preswyl bythgofiadwy fel rhan o'ch Gwobr Dug Caeredin Aur. Mae nifer o gyrsiau wedi'i drefnu dros y flwyddyn, llawn antur awyr agored, cyfeillgarwch a phrofiadau unigryw.
Os ydych chi'n caru'r awyr agored, neu'n edrych am her newydd - dyma'r cyfle perffaith i fynd amdani!
Wythnos llawn antur a sgiliau newydd!
Gweithgareddau Awyr Agored Cyffrous
O deithiau cerdded a chrefft y goedwig i heriau tîm a nosweithiau o amgylch y tan - mae pob diwrnod yn wahanol. Cymerwch rhan mewn amryw o weithgareddau gan cynnwys mynydda, padlfyrddio, cerdded afon a gwylltgrefft dros yr wythnos.
Sgiliau Bywyd
Datblygwch hyder, arweinyddiaeth a gwytnwch drwy brofiadau ymarferol yn yr awyr agored
Cyfle i Wneud Ffrindiau Newydd
Cwrdd a phobl ifanc o bwb cwr o Gymru a thu hwnt. Rhannwch straeon, cydweithio a chreu cysylltiadau am fywyd
Cefnogaeth Ddwyieithog
Mae'r gweithgareddau a'r adnoddau ar gael i ddysgwyr hefyd - trochwch eich hun yn yr iaith Gymraeg drwy gymryd rhan mewn gweithgareddau gyda siaradwyr Cymraeg eraill. Mae hwn yn gyfle gwych i ymarfer eich sgiliau siarad mewn amgylchedd cefnogol a naturiol
Dyma brif weithgareddau’r preswyl, yn ogystal ag amserlen isod i ddangos sut mae'r cwrs yn edrych dros yr wythnos. Bydd yr amserlen yn cael ei wirio a chadarnhau ar ddechrau'r cwrs gan fod pob gweithgaredd yn dibynnu ar y tywydd.
Padlfyrddio Cerdded Afon Mynydda Dringo Gwylltgrefft a choginio tu allan
Gwersyll yr Urdd Glan llyn
Llanuwchllyn, Bala, LL23 7ST
Cyswllt: 01678541000
Dewch i aros yng Ngwersyll Glan Llyn ger llyn Tegid yn Bala. Gyda blocs llety newydd, arhoswch yn Dŷ Eirys neu yng Nghlan Llyn Isa' am yr wythnos ble mae 'na ystafelloedd en-suite cyfforddus, lolfa a chegin fach i gael paned diwedd y dydd. Bydd mynediad at ystafell sychu am yr wythnos i sicrhau bod eich esgidiau ac offer dŵr yn sych am y gweithgaredd nesa'!
Mae bwyd yn cael ei ddarparu drwy'r wythnos, ac rydym yn hapus i ddarparu ar gyfer unrhyw anghenion dietegol - bydd holiadur i lenwi ar ôl cofrestru. Byddwn yn defnyddio ein cegin awyr agored neu ardal wyllt grefft i goginio bwyd ein hunain gyda'n gilydd rhai nosweithiau - cyfle gwych i ddysgu sgiliau newydd a mwynhau bwyd fel grŵp.
Pob bore byddwn yn pigo fyny ein pecynnau bwyd am y dydd os ydyn ni i ffwrdd o'r safle dros ginio. Croeso i chi ddod ag unrhyw fyrbrydau neu ddiodydd gyda chi am yr wythnos, mae 'na oergell ym mhob bloc llety os oes angen. Ar y ffordd yn nôl o rhai gweithgareddau, bydd cyfle i ni i bigo i'r siop neu dreulio bach o amser yn cerdded o gwmpas, er enghraifft o gwmpas Bala neu Fetws y Coed. Croeso i chi brynu bwyd neu ddiod ar unrhyw amser yn ogystal â derbyn bwyd o'r gwersyll.
